මෘදුකාංග ලෝකයේ සුල්තාන් විදියට සලකන බිල් ගේ කථාව

මෘදුකාංග ලෝකයේ සුල්තාන් විදියට සලකන බිල් ගේ කථාව ඇරඹෙන්නේ 1955 ඔක්තෝබර් මසයේ 28 වෙනි සිකුරාදා දවසේ දී සිදුවෙන ඔහුගේ උපතත් සමඟ. ඇමෙරිකාවේ වොෂින්ටන් ප්‍රදේශයේ සියැටල් නගරයේ ඉහළ මධ්‍යම පාන්තික පවුලක උපත ලබන බිල් හැදෙන්නේ වැඩෙන්නේ තවත් සහෝදරියන් දෙදෙනෙක් සමග. මවත් පියාත් දෙදෙනාම උපාධිධාරීන් වුණ නිසා, බිල් ගේ පවුල තුළ අධ්‍යාපන කටයුතුවලට සහයෝගය දෙන සමාකාමී වාතාවරණයක් තිබුණා. ඇත්තටම බිල් ගේ පියා වන විලියම් ගේට්ස් දක්ෂ නීතිඥයෙක්. මව ක්‍රියාශීලී ගුරුවරියක්. බිල් ගේ දෙමාපියන් නිතරම තම දරුවන් තුන්දෙනා විශිෂ්ටත්වය වෙතට ගෙනියන්න උනන්දු කළා. විශේෂයෙන්ම බිල් ගේ අම්මා ක්‍රීඩාවට ළැදී කාන්තාවක් නිසා දරුවන් ද ක්‍රියාශීලීව වැඩ කටයුතු වෙතට යොමු කරන්න පෙලඹුණා.

නිවසේ දී හුදකලාව ප්‍රිය කළ දරුවෙක් වුණ නිසාම බිල් ගේට්ස් තම මවට දැක්වූයේ දැඩි ආදරයක් කාලයක් ගුරුවරියක් විදියට රැකියාවේ නියැළුණ ඔහුගේ මව ඉන් ඉවත් වී සමාජ සේවා කටයුතු වලට සහ ගේ දොර වැඩ කටයුතු වලට වැඩි කාලයක් වෙන් කරන්න තීරණය කළා. මේ ක්‍රියාශීලි බුද්ධිමත් මවගේ උණුසුම බිල් ගේ ළමා කාලයේ සංවර්ධනයට සෘජු බලපෑමක් කළා. සමාජශීලී නොවූ දරුවෙක් වුණ බිල්, පුංචි කාලයේ දී වැඩි වෙලාවක් ගත කළේ පොත් පත් කියවන්න. ඔහු සමහර වෙලාවට පැය ගණන් එක දිගට පොත් කියවන්න පටන් ගත්තා. කෙළි සෙල්ලම සමඟ මුසුවූ දඟකාරකම ඔහුගේ ළමා අවධිය තුළ දකින්නට ලැබුණේ ඉතා කලාතුරකින්. බිල් ගේ දෙමාපියන් ඔහුගේ මෙම සමාජශීලී නොවුණ ගති ලක්ෂණ ගැන ටිකක් බය වුණා. නමුත් බිල්ට වයස අවුරුදු 13 ලබන විටම ඔහුව නව පාසලකට ඇතුළත් කරන්න දෙමාපියන් කල්පනා කරනවා. එසේ කරන්නේ ඔහු සමාජශීලී කරන්න.

අලුත් ඉස්කෝලේ දී ගණිතය, විද්‍යාව, ඉංග්‍රීසි භාෂාව සහ නාට්‍ය කියන විෂයයන් ඉගෙන ගන්න බිල් ගේට්ස් දැඩි කැමැත්තක් දක්වනවා. මේ දේවල් ඔස්සේ ක්‍රම ක්‍රමයෙන් ඔහු හුදකලාවෙන් මිදී සමාජය සමඟ මුසු වෙන්න ප්‍රියතාවක් දක්වනවා. ලේක්සයිඩ් පාසලේ දී ඔහු පරිගණක විද්‍යාගාරය තුළ බොහෝ වෙලාවක් රැඳී සිටිමින් පරිගණකයට පෙම් කිරීම අරඹනවා. ඇත්තටම ඔහු පරිගණක තිරයෙන් එහා තියෙන පරිපථ, වයර් ආදී දෘඪාංගවල ක්‍රියාකාරිත්වය ගැන දැනගන්න දැඩි කුතුහලයක් ඒ පුංචි වයසේ දීම දක්වනවා.

වරක් ජනමාධ්‍යවේදියෙක් බිල්ගෙන් අහනවා ඔබ එතෙක් මෙතෙක් ගත්ත හොඳම ව්‍යාපාරික තීරණය මොකද්ද කියලා. බිල් ඒකට තප්පරයක් වත් හිතන්නේ නැතිව දෙන පිළිතුර වන්නේ හරි පුද්ගලයන් සමග නිවැරදි වෙලාවේදි එකතු වෙලා වැඩ කරන්න හැකි වීම කියලා. එහි දී ඔහු වැඩි දුරටත් කිව්වේ පාසල් සමයේ දීම පෝල් ඇලන් සමඟ එකතු වීම හොඳම තීරණ ලැයිස්තුවේ ඉහළින්ම තියෙන බවත්, පසුකාලීනව තවත් ඔහුගේ දක්ෂ මිතුරෙක් වන ස්ටිව් බැල්මර් ආයතනයට බඳවා ගන්න තීරණය කිරීම තවත් වැදගත් තීරණයක් බව ඔහු කියනවා. අද වගේම එදත් ඉක්මනින්ම මහමොළකාරයන් හඳුනා ගන්න පුළුවන් තීක්ෂණ නුවණක් බිල්ට තිබුණා.

කොහොම හරි බිල් ගේ ජීවිතය වෙනස් කරන යහළුවා පෝල් ඇලන් ඔහුට මුණ ගැසෙන්නේ ලේක්සයිඩ් පාසලේ දී බිල්ට වඩා වසර දෙකක් වැඩිමහලු පෝල් බිල් එක්ක එකතු වෙන්නේ දෙදෙනාම පරිගණක අධ්‍යාපනයට දැඩිව ප්‍රිය කරන නිසා. චරිත ලක්ෂණ පැත්තෙන් සැසැඳීමක් කළොත් මේ දෙන්නා පෑහෙන්නේ නැහැ. පෝල් ඇලන් හැඩි දැඩි ශරීරයක් හිමි ලැජ්ජාශීලී මෙන්ම පසුගාමී පුද්ගලයෙක් වුණා. නමුත් බිල් ප්‍රමාණයෙන් කුඩා ශරීරයක් තිබුණත් අභියෝග භාර අරගෙන ඉදිරියටම යා යුතුයි කියන මානසිකත්වයේ හිටියා. එහෙත්, දෙන්නම බුද්ධිමත් චින්තනයක් හිමි ළමයි දෙන්නෙක් වුණා.

අට නමය ශ්‍රේණි වලට පැමිණෙත්ම බිල් ගේට්ස් පරිගණක ක්‍රීඩා සහ කුඩා ප්‍රමාණයේ පරිගණක වැඩසටහන් සාර්ථකව නිර්මාණය කරනවා. සමහර වෙලාවට පරිගණක සම්බන්ධ මත ගැටුම් පෝල් ඇලන් සමඟ ඇති වුණත් එක්තරා ලක්ෂයක දී ඔවුන් දෙදෙනාම එකඟ වෙලා යළිත් වැඩට බැසීම සාමාන්‍ය දෙයක් වෙනවා. 1970 මේ ජෝඩුව අපූරු දෙයක් කරනවා. එතකොට බිල්ට වයස අවුරුදු 15 යි. ඒ සියැටල් නගරයේ රථවාහන මෙහෙයුම් පද්ධතිය මෙහෙයවන්න අලුත් පරිගණක වැඩ සටහනක් නිර්මාණය කරනවා. එයින් ඩොලර් 20,000 මුදලක් උපයන්න ඔවුන්ට හැකියාව ලැබෙනවා. මුදල් අඩුවෙන් අතපත ගාපු ගැටයෝ දෙන්නෙක්ගේ ඇස් උඩ යවන්න තරම් ප්‍රමාණවත් වන මුදලක් හිමිකර දුන්න ඒ ගනුදෙනුව බිල් ගේ මනස ව්‍යාපාරික පැත්තට යොමු කරන්න සෑහෙන්න බලපානවා. ව්‍යාපාරත් අධ්‍යාපනයත් සමඟ දෝලනය වන බිල් ගේ චංචල හිත හඳුනා ගන්න දෙමාපියන් ඔහුට නීතිඥයෙක් වෙන්න කියලා තරයේම අවවාද කරන්නේ මේ කාලෙදී තමයි. මේ කාලේදී ජ්‍යෙෂ්ඨ ශිෂ්‍යයෙක් වුණ පෝල් ඇලන් පාසල් අධ්‍යාපනය සාර්ථකව නිමාකර අවසාන විභාගයට ලකුණු 1600 න් 1600 ක් රැගෙන වොෂින්ටන් රාජ්‍ය විශ්ව විද්‍යාලයට ඇතුළු වෙනවා. බිල් පාසලේ තනිවුණත් ඔවුන් ඔවුන්ගේ මිත්‍රත්වය නැති කර ගන්නේ නැහැ. කෙසේ වෙතත් පෝල් ඇලන් වොෂින්ටන් රාජ්‍ය සරසවියේ ගත කරන්නේ හරියටම වසර දෙකයි. ඔහු සරසවි ගමනට තිත තබන්නේ පරිගණක වැඩ සටහන් නිර්මාණ කරුවෙක් විදියට හෝනිවේල් සමාගමේ වෘත්තීය ජීවිතය අරඹමින්. කාලය ගෙවී ගිහින් 1973 වසරේ දී බිල් ද පාසල් අධ්‍යාපනය සාර්ථකව නිම කරන්නේ අවසාන පරීක්ෂණයෙන් ලකුණු 1600 න් 1590ක් අත්කරගනිමින්, තම දෙමාපියන්ට විශාල ගෞරවයක් උරුම කර දෙමින්.

පාසලෙන් ඉවත් වෙන බිල් ඇතුළු වෙන්නේ නීතිය හැදෑරීම සඳහා හාවර්ඩ් සරසවියට මේ ඔස්සේ බිල්ට යළිත් ඇලන් සමඟ ඇති කරගත් මිතුරුදම ඉදිරියට ගෙනියන්න අවස්ථාව ලැබෙනවා. හාවර්ඩ් සරසවියට නීති ශිෂ්‍යයෙකු විදියට ඇතුළු වුණත්, ඔහු පළමු වසරේ සිටම කැමැත්ත දක්වන්නේ නීතිය පිළිබඳ අධ්‍යයනයට වඩා පරිගණක පිළිබඳ අධ්‍යයනයට. එම නිසා ඉගෙනීමෙහි අතිදක්ෂයෙක් වුණත් සමහර නීති විෂයයන් ඔහු අසමත් වුණා. වසර දෙකක් යද්දි ඔහුටම තේරෙනවා ඔහු වැටිලා ඉන්නේ වැරදී බාස්කට් එකට කියලා. වැඩිමහලු මිතුරා පෝල් ඇලන් වගේම බිල්ද, තම දෙමාපියන්ගේ බලාපොරොත්තු සුනු විසුනු කරමින් සරසවි අධ්‍යාපනයට දෙවෙනි වසරේ දී තිත තබනවා. ඉන් පසුව ඔහු පැය 24 ම පරිගණක වැඩසටහන් සංවර්ධනය වෙනුවෙන් යොමු කරනවා. බිල් සරසවි අධ්‍යපනය අතරමඟදී නැවැත්වීමේ තීරණය පසුකාලීනව පුද්ගල පරිගණකයේ සිදුවුණ ශීඝ්‍ර දියුණුවට සෘජුව බලපෑවා. මන්ද ඔහු නීතීඥයෙක් වුණා නම් මම කොහොමද මයික්‍රොෂොෆ්ට් වර්ඩ් මෘදුකාංගය මගින් මේ සටහන පහසුවෙන් ලියන්නේ. ඔබ බිල් ගේට්ස් කියන නීතිඥයාට ඇලුම් නොකරයි. එහෙනම් මෙහෙම කතා ඔහු ගැන ලියවෙන්නෙත් නැතිවෙයි. විභාග සමත්වීම සහ තමන්ගේම අරමුණක් හඹා යෑම ගැන කථාබහක දී බිල් මෙහෙම දෙයක් කියනවා. “​ මම විභාග අසමත් වුණා. මගේ යහළුවා විභාග සියල්ලම සමත් වුණා. ඔහු මගේ සමාගමේ සේවකයෙක් මම එහි අයිතිකරුවා

පෝල් සහ බිල්ට පරිගණක ඔස්සේ යමක් තවදුරටත් හිතන්න බලපාන යමක් 1974 පොපියුලර් ඉලෙක්ට්‍රොනික් සඟරාවේ පළවෙනවා. ඒ Altair 8800 පරිගණකය පිළිබඳ ලිපියක්. තරුණයන් දෙදෙනාම මෙම ප්‍රාථමික මට්ටමේ පරිගණකයට ආශා කරන්නේ ඒ ඔස්සේ තව තවත් හිතන ගමන් මෙම පරිගණකය පුද්ගල පරිගණකය දක්වා ගෙනියන්න ඔවුන් කල්පනා කරනවා. ඒ අනුව ඔවුන් එම පරිගණකය නිපද වූ MITS සමාගමේ කළමනාකාරිත්වය මුණ ගැසෙන්නේ එකතු වෙලා යමක් කරන්න හිතාගෙන. MITS ඒ වන විට ඒක කුඩා සමාගමක් නිසා තරුණයන් දෙදෙනාට කථා බහට ඉඩ විවෘත වෙනවා. ඔවුන් ගිවිසුමට එළඹෙන්නේ පරිගණකය සඳහා BASIC පරිගණක වැඩ සටහන ලියන බව පවසමින් ඔවුන් එහෙම කියලා ගිවිසුමට එළඹුණත්, ඒ වන විටත් ඔවුන් BASIC වැඩසටහන ඒ පරිගණකයට ගැළපෙන විදියට ලියලා තිබුණේ නැහැ. ඔවුන්ට ඕන වුණේ ඔවුන් එහෙම යෝජනාවක් කළොත් MITS සමාගම ඊට කැමැත්තක් දක්වනවාද කියන දේ දැනගන්න. කොහොමහරි වැඩේ හරි ගියා. ඔවුන් වැඩ සටහන ලිව්වේ හාවර්ඩ් සරසවියේ පරිගණක විද්‍යාගාරයේ ඉඳන්. ඒ වගේම වැඩ සටහන ඉතා විශිෂ්ටව වැඩ කළා. ඒත් සමග 1975 වසරේ දී බිල් සහ පෝල් ඉතිහාසගත මයික්‍රොසොෆ්ට් සමාගම පිහිටුවනවා. ඔවුන් සන්නම සකසන්නේ මයික්‍රෝ කම්පියුටර් (Micro Computer) සහ සොෆ්ට්වෙයාර් (Software ) කියන පද දෙකේ ගැළපීමක් විදියට. ඔවුන්ගේ BASIC මෘදුකාංගය පරිගණක භාවිත කරන්නන් අතර සෑහෙන ජනප්‍රියත්වයක් ලබනවා. කෙසේ වෙතත් MITS සමාගම සමග ඇති කරගත් මතභේදයක් නිසා ඔවුන් MITS සමාගමේ ගිවිසුම නවතා තවත් ගමනකට මුල පුරනවා. ජයග්‍රහණ මතභේද ගැටුම් සහ අසීරුතා ඔස්සේ කාලය ගෙවී ගිහින් 1978 වසරේ දී මයික්‍රෝසොෆ්ට් සමාගම ඩොලර් මිලියන 2.5 ක අදායමක් ලබනවා. එතකොට බිල්ට වයස අවුරුදු 23 යි. සමාගමේ මුළු සේවක සංඛ්‍යාව 25 යි. එහෙත්, 2012 වන විට සේවක සංඛ්‍යාව 90,000 යි කියන කාරණයත් මතකයේ තියා ගන්න. බිල් ඒ කාලය ගැන කියන්නේ මෙහෙම දෙයක්. ‘​ ඔබ සාර්ථකත්වයේ සතුට විඳිද්දී අසාර්ථකත්වයෙන් ඉගෙන ගත් පාඩම් අමතක කරන්න එපා .

මේ කාලය වන විට Apple, Intel සහ IBM කියන සමාගම් තරගයට ඇමෙරිකානු පරිගණක වෙළෙඳ පොළ ඉක්මනින්ම ආක්‍රමණය කරන කාලයක් වුණා. එවැනි දැවැන්තයෙක් සමඟ එකතු වෙලා වැඩ කරන්න ලැබුණොත් සමාගමට ඉතා ඉක්මනින් දිගු ගමනක් යන්න පුළුවන් කියලා බිල් විශ්වාස කරනවා. ඒ අනුව 1980 නත්තලට ඔන්න මෙන්න තියෙන ශීතල නොවැම්බර් මාසයේ දවසක බිල් තම මවත් සමග IBM සමාගමේ ප්‍රධාන විධායක නිලධාරියා මුණ ගැසෙන්න යනවා. මෙහිදී අපූරු සිදු වීමක් බිල්ට සිද්ධ වෙනවා. ඔහු IBM ප්‍රධාන විධායක නිලධාරියා මුණ ගැසෙන්න කාර්යාලය ඉදිරිපිට සිටිත් දී එහි තවත් සේවකයෙක් ඔහුට කෝපි එකක් හදාගෙන එන්න කියලා අණ කරන්නේ බිල් කාර්යාල සහයකයෙක් කියලා වැරදියට වටහගෙන. බිල්ට වයසට ප්‍රමාණවත් තරම් පෙනුමක් තිබුණේ නැති නිසා මෙහෙම අපහසුතා කිහිපයකටම මුහුණ දීලා තියෙන බව තමයි ආරංචි. පෙනුමෙන් පොඩි වුණත් වයස අවුරුදු 25 ක් වුණ බිල්ට IBM ප්‍රධානියාගේ හිත දිනා ගන්න පුළුවන් වෙනවා. ඔයින් මෙයින් කොයින් කොහොම හරි IBM සමාගම නිපදවන්න නියමිත නවතම පරිගණකයට අදාළ වැඩසටහන ලිවීමේ අවස්ථාව බිල්ට හිමිවෙනවා. එහෙත්, එම අවස්ථාවේ දීත් ඉස්සරහට පැනලා බිල් වැඩේ භාරගත්තත් ඔහුගේ වැඩසටහන IBM පරිගණකයට නොගැළපෙන බව පසුව වැටහෙනවා. බිල් අතට ආව අවස්ථා ලිස්සලා යන්න දෙන්න පොඩ්ඩක්වත් හිතන්නේ නැති නිසා තවත් වැඩ සටහන් කරුවෙක් ගෙන් ඊට සරිලන වැඩ සටහනක් මිලට ගන්නවා. නමුත් ඔහු එම වැඩ සටහන්කරුවාට IBM සමාගම සමඟ ඇති සම්බන්ධය කියන්නේ නැහැ. මේක පසුව දැනගන්න එම සමාගම බිල්ට එරෙහිව නඩු පැවරුවත් බිල එයින් නිදහස් වෙනවා.

එම ගනුදෙනුවෙන් IBM සමාගමෙන් ඩොලර් 50,000 ක මුදලක් සමාගම ලබා ගන්නවා. මේ අතර 1978 සිට 1981 දක්වා කාලය තුළ සමාගම වැඩි දියුණුවක් ලබනවා. IBM සමාගම සමඟ ඇති කරගත් එකමුතුව සමාගමට වැඩි වාසි ගෙනාවත්, IBM සමාගම එම වැඩසටහන සැකසීමට යොදාගත් කේත හෙවත් කොඩ් බිල්ගෙන් ඉල්ලා සිටීම මත ගැටලු පැන නැගෙන්නේ මේ කාලයේ දී. වැඩ සටහන නිර්මාණය කිරීමේ කේත IBM සමාගමට ලබා දීම බිල් තරයේ ප්‍රතික් ක්ෂේප කරනවා. සමාගමේ දිශානතිය තවත් වෙනස් කරමින් IBM සමාගමෙන් වෙන්ව 1985 දී ඔවුන් සමාගමේ ඉරණම සම්පුර්ණයෙන් වෙනස් කරන Microsoft Windows මෙහෙයුම් පද්ධතිය හඳුන්වා දෙනවා. කෙසේ වෙතත් මේ කාලයේ දී පෝල් ඇලන් අවාසනාවත්ව පිළිකාවක ගොදුරක් බවට පත්වෙලා තාවකාලිකව සමාගමෙන් සමුගන්නවා. පෝල් යළිත් සුව වෙලා කරළියට එන්නේ මයික්‍රොෂොෆ්ට් සමාගමෙන් වෙන්වෙලා තනිව ගමනක් යනවා කියන තීරණයත් අරගෙන

වර්තමානය වන විට මයික්‍රොෂොෆ්ට් සමාගම සහ ඇපල් සමාගම ප්‍රසිද්ධියේම බැණගන්න දැවැන්ත තරගකරුවන් දෙන්නෙක් වුණත් අසූව දශකයේ දී ඇත්තටම ඔවුන් එකට වැඩ කළ ගජ මිතුරු සමාගම් දෙකක්. ඇපල් මැකින්ටොස් පරිගණකයට අවශ්‍ය වැඩ සටහන් නිර්මාණය කරන්න බිල්ට ලැබෙන ආරාධනාවත් සමග තමයි මේ ශීතල යුද්ධයට මූලික හේතුව පටන්ගන්නේ. ඒ අනුව ඇපල් සමගමේ සම නිර්මාතෘ ස්ටිව් ජොබ්ස් සමඟ බිල් ගේට්ස් එකට වැඩ කරන්න පටන් ගන්නවා. නමුත් පසු කාලීනව බිල්ට දැවැන්ත චෝදනාවක් එල්ල වෙන්නේ බිල් මැකින්ටොස් පරිගණකයට අදාළ මෙහෙයුම් පද්ධතියේ සංකල්ප මත පදනම්ව වින්ඩෝස් මෙහෙයුම් පද්ධතිය නිර්මාණය කළා කියලා. බැලූ බැල්මටම වින්ඩෝස් මෙහෙයුම් පද්ධතිය සහ මැකින්න්ටොෂ් පද්ධතිය සමාන නිසා බිල්ට තව තවත් චෝදනාව බරපතළව එල්ල වුණා. කෙසේ වෙතත් ඇපල් බලධාරීන් මැකින්ටොෂ් නිපදවීමේ තාක්ෂණයට බිල්ට සම්පුර්ණයෙන් ඇතුළු වෙන්න අවස්ථාව ලබා දීම නිසා බිල් ඒ අවස්ථාවන් යම්කිසි ප්‍රයෝජනයක් ලබා ගත්ත බව තහවුරු වුණා. එම සිදුවීම ඇපල් මයික්‍රොසොෆ්ට් වෛරයට බලපෑව ප්‍රධාන සිදුවීම වුණා. තම ව්‍යාපාරික සතුරා වන ස්ටිව් ජොබ්ස් මිය යන්න ටික කාලයකට පෙර, දෙන්නාගේ ශීතල යුද්ධයට තිත තබමින් ලිපියක් ලියන්න තරම් බිල් කාරුණික වෙනවා. “​ අපි දෙන්නා තරගකරුවන් නෙවෙයි. දෙදෙනාගේ තරගකාරිත්වයෙන් ලෝකයට විශිෂ්ට නිෂ්පාදන බිහිවුණ නිසා දෙන්නාගේම පැත්තෙන් සමාව ගැනීම් අවශ්‍ය නැහැ කියලා ඔහු එම ලිපිය තුළ දී පවසනවා. එසේම ඔහු ලිපිය පුරාම ස්ටිව් ජොබ්ස්ගේ විශිෂ්ටත්වය සහ ඔහු ගොඩනැගූ ඇපල් සමාගමේ විශිෂ්ටත්වය හදවතින්ම අගය කරනවා. තම ප්‍රධානම තරගකරුවාගෙන් ලැබුණු මෙම ලිපිය ස්ටිව් ජොබ මහා සැනසුමක් ගෙනත් දුන්න නිසාදෝ මිය යන මොහොතේත් ඔහුගේ ඇඳ අසල ඒ ලිපිය තිබුණ බව වාර්තා වෙනවා.

ජයග්‍රහණ සහ බාධක මැද්දේ 1986 වර්ෂයේ දී, මයික්‍රොෂොෆ්ට් සමාගම කොටස් වෙළෙඳ පොළ ලියාපදිංචි සමාගමක් බවට පත් කරනවා. සමාගමේ කොටස් හිතුවටත් වඩා හොඳ මිලකට කොටස් වෙළෙඳ පොළ තුළ අලෙවි වෙනවා. එම නව පියවරත් සමඟ සමාගමට මුදල් වේගයෙන් ගලා එන්න පටන් ගන්නේ වයස 31 ක් වෙන්නත් පෙරම බිල් ප්‍රකෝටිපතියෙක් බවට පත් කරලා, මේ කාලෙදි තමයි ඔහු ක්ෂේත්‍රයේ දක්ෂයන්ගේ මොළ එකතු කරන්න පටන් ගන්නේ. එම වැඩ පිළිවෙළ බිල් සමඟ අතිදක්ෂ පරිගණක වැඩ සටහන් නිර්මාණ කරුවන් රැසක් එකතු වෙනවා. බිල්ට දක්ෂ සේවකයන් හඳුනාගන්න තිබුණේ පුදුමාකාර හැකියාවක්. ඔහු රැ කියාවට පුද්ගලයන් තෝරාගත්තේ අමුතුම මිනුම් ඔස්සේ. ඒ ගැන ඔහු අපූරු කතාවක් කියනවා. “​ මම ගොඩක් වෙලාවට ගොඩක් අමාරු වැඩ කරන්න තෝරා ගන්නේ ගොඩක් කම්මැලි පුද්ගලයන්. මොකද ඔවුන් වැඩේ පහසුවෙන්ම කරන්න පුළුවන් ක්‍රමය හොයාගන්නවා. ඒ වගේ අපූරු තේරීම් තමයි බිල්ට තිබුණේ.

1989 වසරේ දී මයික්‍රො ෂොෆ්ට් සමාගමේ විධායක නිලධාරිණියක් විදියට ක්‍රියා කළ මැලින්ඩා සමඟ ආලවන්ත ඇසුරකට බිල් යොමුවෙන්නේ ජීවිතය තුළ ආදරණීය වෙනසක් සිදුකිරීමේ අරමුණින් බිල්ගේ සිහිනය තුළ ඉඩක් ගන්න සමත්වුණ වයස 28 වුණ මැලින්ඩා, බුද්ධිමත් ක්‍රියාශීලී යුවතියක් නිසා බිල් ගේ සිතුවිලි සහ ගති ලක්ෂණ සමග බොහෝ දුරට පෑහුණා. දිගුකාලීන ප්‍රේම සම්බන්ධයකින් පසුව ඔවුන් 1994 දී විවාහ දිවියට එළඹෙනවා. 1994 ජනවාරි මාසයේ දී සිදුවුණ විවාහයත් සමඟ ඔහුගේ මුවගට නැගුණ සතුට ජූනි මාසයේ දී මැකී ගියේ ආදරණීය මවගේ වියෝවත් සමඟ. සාර්ථකත්වය වෙත බිල්ව යොමු කළ ඔහුගේ අම්මා මිය ගියේ පියයුරු පිළිකාවක් නිසා. මේ නිසා 1994 සහ 1995 වර්ෂයන් බිල්ගේ සිත කම්පාවෙන් සහ ශෝකයෙන් පුරවපු අඳුරු සමයක් වුණා. බිල් ගේ විවාහ ජීවිතය ඉතා ආදර්ශවත් එකක් වුණා. ඒක අදටත් එසේමයි. ඔහු ධනයෙන් සහ බලයෙන් ඉදිරියටම ගියත් බිරිඳ සහ දරුවන් වෙනුවෙන් විය යුතු යුතුකම් එලෙසම ඉටු කළා. ඇත්තටම ඔහු සාර්ථක ව්‍යාපාරිකයෙක් වගේම සාර්ථක සැමියෙක් සහ පියෙක්.

ඒ කාලය සමාගමේ වසන්ත සමය වුණා. සමාගමේ භාණ්ඩ සංවර්ධනය කිරීමේ උපක්‍රමය සහ තරගකාරිත්වයට නොබියව මුහුණ දීමේ උපක්‍රම තව තවත් එහි දියුණුව වැඩි කරන්න මූලිකව බලපෑවා. ඒ වගේම පරිගණක මෘදුකාංග වෙළෙඳ පොළේ තිබෙන අවස්ථා ඉක්මනින්ම ග්‍රහණය කර ගැනීමේ හැකියාවක් බිල්ට තිබුණා. ඒ තුළින් ඔහු අනාගත පාරිභෝගික අවශ්‍යතා ගැන අනාවැකි කලින්ම කියන්න සමත් වුණා. මේ සියලු කාරණා ඔස්සේ. 20 වන සියවසේ ව්‍යාපාර සදහා අවශ්‍යම අලෙවි කළමනා කරණයේ අගය තේරුම් අරගෙන සන්නමේ අගය වැඩි කරන සාර්ථක අලෙවි කරණ උපක්‍රම වෙතත් ඔහු යොමුවුණා.

ඇමෙරිකානු ජනමාධ්‍යය සාමාන්‍යයෙන් බිල් ගේට්ස් නම් කරන්නේ එක් ජීවිතයක් තුළ දී ලෝකය දෙපාරක් වෙනස් කම් මිනිසා විදියට, මයි ක්‍රොෂොෆ්ට් සමාගම ඔස්සේ පුද්ගල පරිගණක ක්ෂේත්‍රයේ කළ විප්ලවීය වෙනස පළමු වන වෙනස විදියට නම් කරන අතර, ඔහුගේ දෙවෙනි වෙනස් කිරීම විදියට සලකන්නේ බිල් සහ මැලින්ඩා ගේට්ස් පදනම ( Bill & Melinda Gates Foundation) හරහා සිදුකරන සමාජ සේවා කටයුතු. ලෝක සෞඛ්‍යය නඟා සිටු වීමට සහ අධ්‍යාපනය නඟා සිටුවීමට අවශ්‍ය අරමුදල් සම්පාදනය කරමින් මේ වන විටත් ඔහු දැවැන්ත ලෙස කාලයක් සහ ශක්තියක් වෙන් කරන්නේ ඔහුගේ මෙම දෙවෙනි වෙනස් කිරීම වෙනුවෙන් සමාජ සත්කාරක කටයුතු වෙනුවෙන් බිලියන ගණනින් මුදල් යොදවන මෙම දැවැන්තයා සමඟ තවත් කෝටිපතියන් විශාල ප්‍රමාණයක් එකතු වුණේ ධනවාදයට නව අරුතක් එක් කරමින්.

ටයිම්ස් සඟරාව විසිවෙනි සියවසට වඩාත්ම බලපෑමක් කළ පුද්ගලයන් 100 දෙනා අතරට බිල් ගේට්ස් නම් කරන කොට, දෙවෙනි එළිබෙත් රැජින ඔහුට නයිට් පදවියක් පිරිනමන්න අමතක කරන්නේ නැහැ. අතිශය කාර්ය බහුල පුද්ගලයෙක් වුණත්, ඔහු තාමත් පිස්සුවෙන් වගේ පොත් පත් කියවන හොඳ කියවන්නෙක්. ඒ වගේම ඉඩක් ලද වෙලාවට ගොල්ෆ් ක්‍රීඩාවේ නියැළෙන්නත් අමතක කරන්නේ නැහැ. බිල් ගේ ආගමික මතයක් සමාන්‍ය පුද්ගලයෙකුට වඩා ගොඩක් වෙනස්. ඔහු භෞතිකවාදියෙක්. ඔහු දෙවියන්ගේ පැවැත්මක් ඇතැයි ද නැතැයි ද විශ්වාස කරන්නේ නැහැ. ඔහු වැඩි දුරටත් පවසන්නේ ලෝක ස්වභාවය විද්‍යාත්මකව තේරුම් ගන්න ඔහු වඩාත් ප්‍රිය කරන බව තමයි.

2014 වසරේදී මෙම විශිෂ්ට ව්‍යාපාරිකයා තම සමාගමේ සියලු තනතුරු වලින් ඉවත්ව එම තනතුරු තරුණ නායකයන් වෙත පිරිනමනවා. සියලු දෙනාටම එය පුදුමයට කාරණක් වුණත් බිල්ට නම් එය ජීවිතයේ තවත් සරල සිදු වීමක් පමණයි. මන්ද යත් බිල් ගේට්ස් ජිවිතය දකින්නේ සැහැල්ලු සෙල්ලමක් විදියට මිසක් දරුණු සටනක් වශයෙන් නෙවෙයි.

බිල් ගේට්ස් ලොව එතෙක් මෙතෙක් බිහි වූ විශිෂ්ට ව්‍යාපාරිකයෙක් කියලා අවිවාදයෙන්ම කියන්න පුළුවන් වරක් ඔහු දුප්පත්කම ගැන කිව්ව අදහසකින් මෙම සටහන අවසන් කරන්න මම හිතුවා දුප්පත් වෙලා ඉපදීම ඔබේ වරදක් නෙවෙයි. නමුත් දුප්පතෙක් විදියට මිය යෑම ඔබේ වරදක්. “​

දියුණු වෙන්න නිවැරැදි මග Business HUB එකෙන් අපි දිනපතා පෙන්වා දෙනවා. ඒ හරි මග යන එක ඔබේ වැඩක්…

උපුටාගැනීම Harsha Airawansha Linkedin එකෙනි. අයිතිය කතෲ සතුය.

සැ.යු : උපුටාගැනීම් ඇතුලත්ය. එම උපුටාගත් කොටස්වල අයිතිය කතෲ සතුය.

Business HUB Sri Lanka | ව්‍යවසායකත්ව අත්වැල

TechLabs Innovative Solutions International (Pvt) Ltd

#businesshubsrilanka #techlabs #charityshop #daneshedirisooriya #business #swayanrakiya #onlineearning #entrepreneur #selfemployment #emoney #Technopreneurs #සිතුවිල්ල #charityshopsithuwilla #sithuwilla #businesshubsithuwilla